世紀婚宴

咁大個女, 最值回票價既人情就係呢個婚宴. 雖然同個同事唔算好熟, 不過都好多謝佢請我去飲, 一次過參與婚宴+政界餐聚+東華三院賑災夜!

男家係做基建工程, 政府高官熟過乜啦~ 睇完註冊片段, 先知原來男家係咁猛料,哈哈~
前律政司梁愛詩做主婚官, 立法會主席范徐麗泰, 特首曾蔭權都有黎, 好勁呀!



會展延開168圍, 台上煙花匯演少不免, 仲請埋羅敏莊同蔡子健做MC, 仲唔係大show?!


望下望下, 隔隔離圍坐左田北辰同曹宏威呀! 佢地仲坐得後過我地, 女家真係對同事不薄...
臨尾老鼠安趕到黎, 佢同男家係鄰居黎架. 不過佢宜家人氣下滑, 都冇人叫佢~


Smiling face乳豬, 真係細心... 燴田螺幾靚,不過唔好食...鮑魚太焾, 感覺有d怪,都係奶奶整得好味!

食完翅後仲要每圍再上台影相, 足足影左2個鐘. 男家老爺上台多謝各方好友後, 仲話當晚所有人情捐哂去四川賑災, 保守估計都有百幾二百萬. 真係好, 又幫到d災民 :D 有保良局咩主席, 東華呀, 仁濟總理, 仲唔係" 慈善星輝仁濟夜 "?

呢d咁既場合, 一世人真係唔多機會有得去(對我呢d平民黎講). 不過, 我相信我應該仲有一次機會可以去到呢d咁既婚宴...咪就係你囉, 係呀, 講緊你呀, 睇緊人地個blog果個呀!! 幾時先肯嫁比人o者, 你都唔細啦, 係唔係要父母擔心先? 請飲記得搵我呀...話哂一場舊同事, 哈哈~

P.S 在此鳴謝同事N整晚不停咁影相, 好似狗仔隊咁, 我先可以咁原汁原味去報告呢個婚宴, 辛苦哂!

完了...就是完

10天西班牙葡萄牙之旅完了, 話咁快就過, 又要回到現實...

整個trip算唔錯啦, 無論住呀,食呀, d團友,個領隊. 尤其係團中既一個小朋友, 佢好可愛呀! 唔係太喜歡小朋友既我都忍唔住同佢不停咁玩, 都有d掛住佢,哈~


最可惜, 就係冇野可shopping...係HK勁蒲既Zara & Mango, 去到竟然1件都買唔落. 又話皮具出名, 我又一個手袋皮鞋都買唔落. 究竟係個團既行程去唔到可以買到野既地方, 定係果度係冇野o岩我買呢? 真係無從稽考...草頭不知幾歡喜, 估唔到買到既手信仲少過去大陸台灣. 到最後只係買左個風車擺設, 跳Flamenco時用既樂器 ,同大堆超市既薯片, 芝士條, 餅乾, 花生等.


(高2.5吋既風車仔要6€, 成港紙$80隻, 超貴, 唔值囉!!...但又好靚, 所以只係買左一隻比自己, 哈!)


我最鍾意就係個天空, 個天好藍, d雲好白好似棉花! 係HK真係冇可能見到 .




建築物都好靚好宏偉, 不過歐洲城市個個都差不多啦. 我去過既雖然唔算多, 但都已經有呢個感覺. 呢個trip最鍾意既就係呢幾個 :









影左成千張相,有興趣睇多d相可以去http://picasaweb.google.com/michelecheng/SpainPortugal

放完假返工3日已經攰到想死, 黎緊仲有幾壇杰野, 唉...又有排上堂啦~ 雖然定左deadline, 不過仲好似有排先到. 至於deadline後又點呢? 又未諗到喎...

四川地震令我諗起中學時睇既唐山大地震, 真係慘不忍睹. 學校內既一段對話令我O哂咀 -
同學A: 四川地震單野真係好陰公...
138: 係啦, 不過溫總既PR真係不得不讚!
同學A: ......

今日同草頭去左食齋, 蘇杏璇開果間, 真係幾好味! 不過我想講係坐係隔離枱既男顧客同侍應對話.
男: 請問呢個羊腩煲"蘇唔蘇"架?
侍應: 呢個羊腩煲係齋黎, 唔"蘇"架, 放心!

我同草頭勁忍笑, 佢究竟知唔知自己係黎食齋既呢? 定係我地太無知, 宜家d 齋係可以做到將"蘇"味注入d麵粉麵根度呢? 係既話請話聲我知, 費事比人笑返轉頭!

我投降...

如果唔係定左日子, 我諗我今日會覺得好難受, 好難過...對住佢真係好鬼辛苦, 好攰呀!!!我知道唔好成日比佢影響到我情緒, 但偏偏我又確實係一個好易受人影響情緒既人. 唔想講...

和三味

日本就唔可以隨時去,不過日本野就可以隨時食. 今次推介係銅鑼灣SOGO側東角中心22樓既"和三味" (電話: 28318989), 去食lunch set就非常抵, 好好味呀~ 雜錦魚生粒飯定食:有前菜,有salad,有湯,有蒸蛋,有一大碗餸多過飯既魚生飯(上面仲加左溫泉蛋),仲有生果加雪糕/餐茶!!!2點食飽到7點都仲未食得落飯, 都係$128/set...雖然都係貴左d,不過一分錢一分貨嘛, 間唔中一次都唔過份既

轉下眼就返左差不多半年新工, 頭3個月就honeymoon,之後兩個月就pkp到... 今個月就過返d正常d既生活. 而且今個月同佢相對既時間較少, 感覺舒服好多...加上過多5日就"向世界出發", 心情既緊張又興奮. 不過, 仲要過埋最痛苦既一關先..."PMS", 呢個並唔係解為Pre-Menstrual Syndrome, 而係Performance Measurement System. 查實咪係appraisal一個, 不過又要懶係360度周圍問人令意見, 睇下自己可以有咩改善既地方. 仲要同你既上司下屬開一個單拖大會, 傾傾點樣可以"互相幫助成長". 雖然係我既第一次, 不過好明顯我係好憎呢d咁假既行為. 要懶係好清楚點去coach你既下屬, 又要懶係好清楚自己想係邊方面被coach,再develop多d...唉, 仲慘過考試. 所以學舊同事話齋: 每逢到呢個時候, 就係想遞信既時候....確實, 好有同感

Concert

今日掛3號風球, 仲要黑雨(...竟然係放假既星期六先黑雨, 好浪費), 但買左劉美君演唱會飛, 唔去唔得啦. 結果同個同事兩個落湯雞, 傘都吹壞埋, 浸住兩隻腳睇concert.

聽返十幾年前既歌, 一樣好聽, 覺得自己又返去五六年級既時候... 果時仲係聽緊卡式帶, 仲要係問人地借原裝帶黎DUB(邊有錢買喎, 幾十蚊餅架!). 親手抄抵鍾意果首既歌詞. 所以以前d歌, 到宜家唔駛對字幕都識唱, 分分鐘仲熟過個歌手. 今晚唯一失色係隔離坐正個肥師奶(我估都50歲), 佢個pat頂足我全場. 搞到我都唔好意思跟住唱, 又唔敢好大動作咁打pom pom條喎!!

我睇親concert都有一刻好感動, 好想喊. 呢刻並不一定係個歌手係度喊或者講d咩心底話, 而係整個場地既觀眾一齊跟住個歌星大聲唱, 一齊揮動手上既螢光捧/pom pom條!!!我一見到呢個場面就會好感動, 眼有淚光, 哈哈....

暫時睇既咁多場concert(一年頂多一場), 我都係最喜歡草猛!!!跟住跳足一晚, 唱足一晚, 打pom pom條打足一晚, 好high 哦~~~

心血來潮

近來無論係朋友圈中或者同事圈中都收到好多婚訊, 令我突然間令返自己結婚當日既DVD黎睇. 睇完又有一種好幸福既感覺, 呢種感覺唔止係來自於搵到個好老公, 而亦都來自於一班好朋友. 見到一班好姊妹為我既婚禮game 籌備, 仲記得果時我不停問呢問路, 指指點點, 驚死佢地做漏野咁! 仲有班男姊妹即call即到, 有心出心, 有力出力, 有車出車! 我唔識點對佢地好, 或者點去表達對佢地既愛, 但我知佢地同我老公一樣, 永遠都會支持我, 對我不離不棄, 比我搵到source of 幸福!

好奇怪, 印象中我既快樂冇咩係來自家庭或者工作, 反而主要係來自讀書時既生活, 成績, 朋友, 拍拖, 老公. 上天係公平既, 樣樣都咁perfect, 你咪好得戚?!?!

大角咀美食

係大角咀區都住左差唔多5年有多, 不過對本區有咩出名既正野食就唔多熟悉lu...好彩草頭成日同d同事周圍去食, 有d都可以帶我去試返. 呢間椒鹽豬扒飯真係不得不提!!!

位於大角咀角祥街既耀記食店, 係一間好"豆踎"既飯堂仔, 附近都係d五金舖, 車房咁. 你唔好旨意係入面會坐得舒舒服服, 但要黎個快既又好味既就完全冇問題! 我最鍾意佢既椒鹽豬扒飯, 可以mix埋魷魚, 腸呀,蛋呀等等...d豬扒又香又林,個豉油味道又o岩o岩好, 超正!椒鹽雞翼$10/3隻, 超香! 一大碟飯仲有咁多塊豬扒都只係$25, 大家樂都唔得啦~ 仲有老闆娘煲既竹庶水, 都係$10/支. 同草頭兩個人叫兩碟飯, 一碟雞翼, 一碟菜, 一支竹庶水, 埋單都只係$70... 抵到爛!!!

人地係家族小生意, 所以唔係日日開架, 冇記錯好似係星期一至六架咋 (時間唔記得lu, 好似收9:30pm)~ 總之附近有人返工就開啦!



工作無非為左食同玩(哈,好無大志,好自私呢~), 5月就去Portugal/Spain(如果成團既話...), 7 月就去東京掃貨. 搵得咁辛苦既錢, 一下子就可以駛哂~ 所以都係plan緊幾時停止搵錢, 咁應該可以學識慳d! 比左個deadline自己, 總好過強迫自己. 日日對住唔喜歡既人同事, 好攰...

agnes b. le pain grille

我並唔係agnes b番薯, 不過叫做貪佢個名, 又聽講唔係超貴, 即管又去見識一下.

環境唔錯呀, 古巨基首"情歌王"MTV就係呢度拍. Waiter服務都一流, 有笑容有禮貌. 我地坐低左一陣都冇見佢斟水, 以為一定要order drinks，就叫左杯Agnes b. Special (其實係杯茶，話用咩特別herbs果ｄ啦～).　不過我覺得味道一般，有ｄ怪，可以唔駛叫～況且，佢地原來係會斟水既... Waiter搬左個menu過黎介紹是日special，如以往一樣，我都係唔知佢地講緊ｄ咩野食.　睇完個本裝menu後，order左個onion soup, salmon 扒, angus steak 同埋chocolate souffle.

個湯有ｄ驚，可能我飲慣既西湯都係creamy d. 不過salmon 扒同 angus steak都好好味，份量都唔細． 至於souffle就一般啦，同自己整好似差不多，內裡好濕咁! 佢地推介apple tart，不過我對apple味dessert冇咩興趣(McDonald apple pie除外). 最後送上carrot cake，味道幾特別，唔錯!

2個人埋單$700，都算貴架!不過間唔中一餐都要慰勞下自己既～

星期六

估都估唔到今日跟shooting都要跟到11點,唉...不過, 有1整日時間同鉛筆單獨傾計,都未嘗唔係一件好事. 之後既路點行好似多左d明確方向. 希望事情既變化如我所願, 大家都可以活得快樂一點~

星期五

今日11點,早左少少架啦....聽日下午又再shooting, 不過梗係有得補返鐘啦~
已經非常之exhausted, 起碼死多一個星期先easter假... 但係放假果幾日都要落舖巡下人地做research做成點喎. 呵~

星期四

8:50am 返到公司
9:15am 落舖執貨開單for下午shooting
10:15am 趕出發到將軍澳shooting
11:00am Shooting 開始
2:00pm 係studio食凍KFC
2:30pm 係studio傾埋公司d野
3:00pm Shooting再開始
5:45pm 離開studio趕返公司
6:15pm 上普通話班, 遲到15分鐘
6:45pm 離開公司, 到金鐘某大酒店attend某大頒獎慶典＋晚餐
9:30pm 離開酒店

以上schedule全無休息時間咁制，lunch break係唯一坐低抖下既時間...
食左兩件凍KFC雞咁大把，以為夜晚有餐好既食，點知食完個appetitizer同個湯就要離開，我原先order左個main course要fish架...

星期三

今日, 12點零5分...好攰

星期二

執到啦,今日9點就走得! 不過口水多多,又同鉛筆係公司傾左成個鐘計, 成10點幾先走...最衰係鎖門步驟錯左, 連累負責公司security既同事要係元朗出黎鎖門, 真係令我過意唔去. 不過原來佢出一出黎有幾百蚊收返, 嘩, 比我就晚晚出黎囉~

星期一

今日收11點,比上星期既12點2仲距離1個鐘多d,多謝哂...已經忘記左係第幾個星期過呢d生活! 人地越捱越瘦, 我就越捱越肥, 有冇搞錯呀!! 已經返到屋企冇飯食架啦, 只不過係公司食左d燒雞粒,朱古力同甘大支咋嘛...

嘆十聲

好彩有草頭，鉛筆同傻貓"十扑"我！雖然我事業線生得唔好，不過我姻緣線同人緣線都不俗，個天真係公平!

新玩具

基於easter旅行去唔成, 所以又比自己有藉口買玩具....iPhone! 咁o岩草頭朋友既朋友可以係美國幫手買, 而且價錢相當吸引, 係引誘之下就買左一部 (其實想買兩部, 一人一部, 不過人地有quota, 無計!) 有新玩具就當然係我玩先啦, 佢幫我加lee加路入落部機已經好開心

畫面夠大, 睇相一流! 再加埋好多function, 超好玩! 宜家終於可以加返來電顯示相, 下次見到你比我影返張相先~

好想...

好想變得聰明d, 好想個腦轉得快d, 好想學好英文, 好想時光倒流, 好想去旅行, 好想放工學日文, 好想每個weekend都係long weekend, 好想減肥, 好想堅強d, 好想唔駛做, 好想唔駛憂錢, 好想理性d, 好想知足d, 好想開心d...

低能模仿大賽

係公司做到夜夜地, 就係大家開始發癲既時候...令住大同出trip時買既sushi原子筆手信, 係度鬥邊個扮食sushi最似, 笑死我!!...得快樂時且快樂啦, 唔知仲可以頂得幾耐...

SF痕

隻右眼皮膚無啦啦發炎, 今日終於的起心肝去睇醫生, 其實已經拖左2個星期有多, 我見化左妝唔覺嘛, 諗住過耐d就會自己好返架啦~ 預左醫生實唔叫我停一排唔好化住, 所以即刻係櫃搵返副舊既平光鏡出黎帶返. 不過宜家睇返副鏡好似好怪咁, 返工完全唔o岩駛. 結果又走左去高登配過副, 又破財, 唉... 唔駛化妝真係慳好多時間, 返黎又唔駛落妝, 好舒服! 只係出街時唔係好敢擔高個頭, 或者同人地正視. 希望大家對我個四眼look既comment唔好太差, 等我可以慢慢試下唔化妝出街既feeling...

專登影定張相比你望下, 有定心理準備, 下次見到我呢個look時扮冇乜反應, 多...哂!

唉...

今日係好痛苦既一天, 腹背受敵, 但又唔可以抽身離去...幸得鉛筆撫慰情緒, 兩條友仔齊齊唱K 5個小時, 唱完個人舒服哂~~ 但問題尚未解決, 有冇神仙可以打救呀